CHOKO TLEN OMOTEPETZAK Lázaro Reyes Flores

19 04 2009

Ome iknimeh oyahki opaxialoto ichin tepetl. Sen okiwikaya tomin wan okse amo, san okiyolchikahtiah. Niman okittakeh okatka se tiankistli ipan mixtli, wan miak tlakameh okikohtokah, michin, iwan okseki tlatlamantli tlen ompa okinemakaya. Choko tlen okiwikatoka tomin okili iikni:

—Ma nikowati michin

Niman oyahki nepa, kanin oksekimeh tlakameh okinittak omotlakowihtokah. Yen choko tlen amitla tomin okiwikatoka, okiittak kenik opehki pohpoliwi tiankistli wan mixtli iknochi iikni.

Opehki kitzahtzilia iikni, amo kanah okahsik, wan kemin amikah okittak, miak omotekipacho wan omochokili satepan owalewak oasiko ichan, omoteilwi innawak itahtzin wan inantzin okinili:

—Onikpolo noknitzin, amo onikittak kanin omokah, noso akin okiwikak.

Itah iwan iyolikniwan okahwakeh wan okinekiaya kikaltzakuaskeh nepa teilpiloyan. Ihkuak okitlapohpolwihkeh. Omotlahtlanitoh inawak sen tlachixki ma kinmelawili tlenon okichiwaskiah, yehwan amo okimatiaya tlekan ihkon omochihtokah, tlachixki okinili:

—Mopilton omotepetzak, kihtowah sehsen xiwitl ihkon tlamochiwa, tlahko tonalli. Axan san ximochiakah okse xiwitl tepetl ma motlapo, wan ompa xikchiatih moyolikni, wan yeh oksemi inkittaskeh, xikwalikakah tlamo ompa mokawas iwan nochipa tepetzaktos.

Wan ihkon opanok okse xiwitl, iikni okichiato kanin omixpolo kemin okihto tlachixki, oksemi okittak iikni tiankisko, motlakowia, niman ipan otzikuinki wan okiwilanki, ayakmo okikawili ma kitlanamakiltikah, opehki motlatzahtzilia   wan mochokilia. Iikni okili:

—Tlekan tichoka?

Yeh okinankili:

—Teh noknitzin otimixpoloh yise xiwitl, wan otimitztemohtokah nochtin tlen tikateh ompa kalihtik, axkan ma tiyakah tochan ompa ximosewiti.

Ahsitoh inchan, ompa okinchixtokah intahtzin wan inantzin. Yehwan miak omopakiltihkeh, ihkuak okiittakeh inkonewah ahsito, Ihkon ayakmo okinkawilihkeh tepetl ma yakah