IN OLINTONALXOKOYOMEH Santos Carvajal Garcia

14 11 2010

Se tlahkatli, masewalwewetkeh omotlapowiayah:

-Yi onka tonalli, yi onka metztli, sitlalimeh, tlalli, atl iwan nochi okseki tlamantli.

Satepan, senmeh otlahto. Tlen okachi yi okokoxkatik okihto:

-Tlen amehwan ankihtowah amo yi nelli, amo nelli nochi  tla onka, okseki tlamantli poliwi, xikittakan nochi tlen techyawalohtok iwan xikahsikamatikan tlen nimechilia.

Nochtin omontenkahkeh, opehki tlahtlachiah iwan amo okittakeh tlen opoliwiaya.

Wewetzin ok semi otlahtotewak iwan okimilli akinmeh okixnamiktokah:

-Nochi tlahkatli tikitta wei tlanexotl, in wei tonalli tla kualnextihtok itech nochi semanawaktli, kemanian kualtis kualanis iwan ayakmo pankisas ayik kanin kisani, nochi mokawas tliowatok, moneki inawak se motlasohkamatis iwan se kimawisoittas, amehwan xikihtokan kenin iwan akinmeh tlapalewiskeh.

Ok semi omotenkahkeh nochtin, san omotlahtlattayah, ihkoni  iwan ihkoni okatkah san kanin se siwatzintli otlahtotewak:

-Neh kualli nikmattok tlen poliwi, moneki nesiskeh yehwan In Olintonalxokoyomeh, akinmeh inmak kahki tetlasohkamatiskeh iwan kimawisomakaskeh in towei tonalli.

Ihkuak nanatzin oltanki otlapow, in okseki masewalwewetkeh sawel miak oyolpakeh iwan ok semi opehki motlapowiah ipampa kenin okintemoskiayah In Olintonalxokoyomeh.

-Yi otikmatkeh tlen opoliwiaya, _okihto okse wewetzin_ axkan tiaskeh tikintemotiweh itech nochi altepemeh, achto tiaskeh Zongolica altepetl, satepan ik ok sehsekan.

Otlanki omotlahtlapowikeh iwan omoyektlayehyekoltikeh, kualli  omihtakatlalilihkeh, kualtzin okinwalmomamaltikeh imayawan iwan ika inkuawtlaketzaloni onewakeh opehki kalnemih itech nochi altepeyo, ken momati, achto oyakeh ik Zongolica, ihkuak ompa oasitoh san nimantzin okittato se kualli masewaltelpochtli, akin kualyotika iwan ika miak mawisotl okontlahtlapalokeh, satepan, in tlakatl tlen okachi yi wewetzin opehki kualtzin iwan motlapowia.

-Ika miak pakilistli iwan ika miak mawisotl otimitzittakoh; yala yi wiptla ihkuak tlen okachi yi tiwewetkeh otimonechikohkah itech tokalpol, mopampatika otimotlapowikeh iwan otimotlayehyekoltikeh, ¿tikmatis?, in tonaltzintli ik semihkak iwan semihkak tlakualnextihtok iwan ayik ikah kitlasohkamati noso kimawistilia iwan nion akin kitekipachowa kenin iwan tleka techtlawilihtok, tehwan tikyehyekowah kualtis mokuesos kemanian iwan techkawas sapanowa tliowakan, ik inon otikyehyekohkeh tikintemoskeh akinmeh moneki nochipa ma kimawisomakakan iwan ma kitlasohkamatikan, teh chokko mopan yi otitlayehyekohkeh iwan ika nochi toyolo otimitzonixpehpenkeh kox amo okualtiskia techonnankilis.

-Tla nopampatika oantlayehyekokeh, -telpochtli otlanankili- noihki ika nochi noyolo nimechtlasohkamati miak iwan nimotemaka itech inon tekitl.

-Yi otechnankili, noihki monawak timotlasohkamatih miak, tehwan   otikyehyekokeh timitztokayotiskeh Xochitlali. Axkan tehwan tiawih okachi wehkatzin kanin tikintemotiweh oksekimeh akin mochiwaskeh mokniwan.

In wewetkeh omomakahkeh inawak telpochtli iwan opehkeh tepankisah, otetlahtlahpalotinenkeh ik itech altepemeh Tequila, Tehuipango, Texhuacan, Atlahuilco, Astacinga, Tlaquilpa iwan ik oksekan kanin okintlapowitoh okseki telpochmeh iwan ichpochmeh.

Iwan ihkuak yi okittakeh okimahxitikeh tlen akinmeh omochiwaskiah Olintonalxokoyomeh, wewetzitzintin ok semi omonechikohkeh iwan kualli omonahnawatikeh tlen tonalli otenotzaskiah.

Se kualkan, masewalwewetkeh otenotzkeh ika in wewetl iwan atekokolli, telpochmeh iwan ichpokameh yi okimatiayah akinmeh kinnotzah iwan san kuinalli omonechikotikiskeh ika miak pakilistli  ompa Tlalokan kanin okatkah wewetkeh, sesehsen okinselihtiakeh ika se xochimanalli, xochikoskatl iwan tlapopochwilistli, kualtzin okimixtonalwikeh. Ihkuak otlanki okinmakakeh inon wei mawisotl noihki nimantzin opehki kintlapowiah iwan kinnahnawatiah.

-Anmotlawelkakilis iwan anmoteixpantilis miak techyolpaktia, axkan timechteochiwaskeh iwan timechteixpantiskeh innawak nochtin tlakameh iwan siwameh, ma kualli kimattokan tlen anmopan kistok iwan tlen ankichiwaskeh; towei tonalli, ankimakaskeh mawisotl iwan inawaktzin nochipa anmotlasohkamatiskeh topampatika ika nochi anmotlachiwal iwan anmotlayehyekol; xiyoltokan, xinemikan iwan xitekipanokan ika miak pakilistli, ximoyekwikakan ika in nochi anmokniwan iwan xiktlasohtlakan nochi tlen tlaltikpak onka iwan ihkoni kualtis ikahmeh anmopampatika tlapowaskeh noso aik mechilkawaskeh…                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                Ihkoniotlahtlanawatikatkain se wewetzin iwan san nelihtika se telpochtli  tlen okachi xokoyotzintli okitlahtolkotonki iwan otlahtlanki:

-Yi otikmatkeh tlen tikonchiwaskeh iwan axkan otikmatiskiah, ¿tlen tokaitl tikpiaskeh?

-Ken yi otikyehyekokah, se yetos itoka Xochitlali, okse Tetahchi, okse Tekitlahto, okse Tlayakanki, okse Tzawani, okse Siwatlanki iwan okse, Topile. Yi otimechpehpenkeh, yi otimechnahnawatikeh iwan nochtin yi otimechtokayotikeh, axkan ika kualyotika xikchiwakan tlen se omechtlahtlapowi, tehwan noihki semihkak timechpalewiskeh iwan anmopan titlachiaskeh.

Otlankeh omotkapowikeh iwan ika miak pakilistli on monahnawatikeh. Ik axkan sa yehwan In Olintonalxokoyomeh se kimitta kenin yektekipanowah, kimawisomakah iwan kitlasohtla towei Tonalli.

In Olintonalxokoyomeh ihkoni oneskeh iwan ik mohmostla motekipachowah iwan kiyehyekowah kenin okachi se yektekipanos iwan se yekyetos ika in nochi tokniwan nikan tlaltikpak.

Anuncios

Acciones

Information

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s




A %d blogueros les gusta esto: