TAKOH AMO TLAWELKAKINI* Ramón Tepole González

24 11 2010
Takoh amo tlawelkakini

Xitlawelkakika

Okatka se takohtzin tlen amo okinekiaya kinwelkakis itahtzin wan inantzin, tlalia itlah okinawatiaya yeh san otlananankiliaya wan amo otlawelkakiaya, nihki okipaktiaya kinmohmotlas yolkatzitzinteh wan nochi tlatoktli.  Se teotlak  inantzin okinawati ma kichipawa sintli wan ma tlioya, takohtzin amo otlawelkak  wan oyahki kahwentla.  Ahsito ikxitlan  se kuawitl kanin se tototzin otzopontoka, niman okololoh miak tetl wan  opehki kimohmotla.  Inon tototzin, san nikan nepan otzihtzikuiniaya ihkuak takoh okimohmotlaya.

 Kemin okachi miak okimohmotlaya, tototl sanelihki wel weyi omoskaltih  kanpa okipanowito takohtzin itlakayo; ompa keman  takohtzin melahkayopan omomahti, okittak kenemin  inon weyi tototl  omahaswahlapoh,  okikitzki  wan wehkapan okiwikatewak. Takoh, otzahtzitiyah wan inawak tototl omotlatlahti:

 —¡Techtlapohpolwi !, ¡ Techtlapohpolwi ! ¡ Ayakmo niyetos niixpetoktli ! ¡ Nochipan nikinwelkakis notahtzin wan nonantzin !, ¡ Nikinwelittas yolkatzitzinteh wan tlatoktli !

 Tototl okinankili:

—Neh amo kualtis nimitztlapohpolwis, onechtitlanki  tlalokan nantli,  wan yeh iniwian tlanawatis kox ok tiyoltos  —wan omihyokah. Takohtzin okachi omochokili.

 Wehkapan, itlahkotian  tepetl okittak se weyi ostotl, ompa okalakito inon tototl iknochin itlamamal. Niman takohtzin okittak  se tlawiltzintli chichiltik kanin tototl okikahka. Takohtzin  oksehpan  omochokili wan okiwalihto:

—¡Techtlapohpolwi!, ¡ Techtlapohpolwi !  ¡Ayakmo nixolopehkistos! ¡Nikinwelkakis  wan nikintlakittas  notlayakankawah wan nochi tlen onka semanawaktli niktlasohtlas.

Ihtik ostok omokak  tlalokan nantli, chikawak omotlahtolti :

—¡Ximihyokawa!.

Iwan oksehpan otlahto:

—Teh  amo kuali titekone, wan amo kuali titeyolikni, amo timoyehyekowa tlalia nikan nepan titlatzonteki titlaxima, titlamiktia  wan san tlen amo kuali tikchiwa nihki tikin pihpinatia, tikinixkomaka monantzin,  motahtzin wan  mokniwan. Tlalia tikxima se kuawitl, tikmohmotla se tototl, tikinpachilia  moyolikniwah, noso amo titlawelkaki, nihki techyolmiktia  wan amo tiktlasohkamati tlen nimitzmaka  kanpa timoyolitis  itech inin tlaltikpaktli.

Oksemi okinahnawati: 

—Nikan tlaltikpaktli nimitzkawas   tlalia melahkayopan tiyeknentos.

Takoh otlanankili :

—¡ Kema ! ¡ techkawa ! wan tikittas kenemin  nikpatlas nonemilis

Ihkon tlalnantli okinawati tototl:

—Ichan xikawati inin takoh.

Tototl opatlantikiski wan okiwikak takohtzin. Ompa wehkapan okilihtiyah:

—Xikitta tlen kualtzin totlaltikpak nochi tlaxoxowixtok, amo tlapanowa wan amo tlapolowa, yen tlakatl nochi kiawilchiwa, kiihtlakowa, moneki kipatlas itlayehyekol.  Wan teh nihki, moneki tiyeknentos wan  tikiitlatlalwis oksekinteh moyolikniwah kenemin kimalwiskeh tlaltikpaktli kanpa amo ihtlakawis.

Takohtzin ahsito ichan, yoliktzin okalakito kanin inantzin okichixtoka.  Takohtzin okinapaloh wan okilli:

—¡Techtlapohpolwi nonantzin!, axan nimitzmolwilia melahkayopan nikpatlas notlayehyekol, tlalokan nantli onechkawili ok ma niyolto, wan tikittas amo nemechkahkayawa.

Inantzin amo okiyekkak, tlen itakoh okikakiti san okittak inon tonalli opehki kipatla inemilis.


* Zongolica, Veracruz.

Anuncios

Acciones

Information

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s




A %d blogueros les gusta esto: