Notlakayo Guadalupe Citlalli Hernández Ramírez

14 02 2011



Notzontekom, noahkolwah

Notlankuah, nokxiwah

Notlankuah, nomawah

Wan ma

timotankachokah

Anuncios




Itech altepemayotl Ascuahtlamanca ihkon kichiwah mikkailwitl

14 02 2011

Tikpewaltiah se domingo achtopantika. Totahwan motlakowitiweh nepa tiankisko Comalapa noso Zongolica;, ompa kinkowah chokolatl, velas, veladoras, kopali, chatanahtli, tanahtli, popoxkaxitl, petlatl, mekapali, chikiwitl, kuaehkawilotl, ayatl, morral, amaxochitl, tlakemitl, tzopelik, nochi tlamantli tlen kinehnekih ihkuak tlakualchiwah kemeh: kaxmeh, konmeh, xikaltih, chilli ancho, ahwiyaltin, noihki kiwalikah tzotzoltih, teposmeh tlen kinnehnekih tlalan wan okseki miak tlamantli.

Noihki ompa kixelohtewa pantzin, nakatl wan walewa tlakowalxochitl; semanahpah motlachiwia kalihtik, tlayektlalia tlixpa, kimpopowa totahtsitsinteh, kimpaka tlakenmeh wan noihki kuawkuitiweh. Kitemova noso tetlatlahtia itla tlakilotl kemeh ayohtle, tzapotl, xokotl tlen kitokayotiah malta wan ihkuak amo kualtzin xotla tekaya tlen yewan okixinihkeh, kitemowah akin kipia miak wan kikowiliah noso san kichiwah tlapatlalli.

Jueves san kualkantzin tatameh yawih ich tepetl kikuitiweh tepexiloxiwitl, camedor wan tekaya. Nanameh pewa tamalchiwah, kiketzah kahwen, chokolatl, ayohtli, yamehtli, tzopelikamohtli, witsiohtli wan kuawnexatolli.

Ihkuak tlakopatiweh tatameh pewah tlachihchiwah , kichiwa se tlahkotankaxtli noso tololli ika se kuawitl wan kitlaliah iyakapan tlixpantli, kualtzin kichihchiwah ika tekaya wan tesontzin, tepexilomaitl wan camedor , kipepechowah ipan tlawipanalli, kipotoniah miak tekaya wan kixochiotiah se ohtli kanin panoskeh tlen yoixpolikeh.

Ihkuak ahsi tlahko tonalli kitlaliah nochi tlamantli tlen okichihkeh wan tlen otlakohkeh, mixpowah, tlapopoxwiah wan kimilnamikeh nochtin konemeh wan piltomeh tlen yomikkeh. Ikon panowa se tonalli.

Mostlatika viernes noihki tlahko tonalli kachiwah tlen yopowik wan kitlalia okseki tlamantli tlen yankuik, ikon kinchia nochtin tatameh wan nanameh tlen yoixpolikeh, yehwan kinmahxitiliah aguardiente, kaxtila, chichikeh wan nochi tlamantli tlen okinpaktiaya ihkuak oyoltokah.

Sabado tlahko tonalli kinmakawah tlen yomikkeh, kintlawiltiah velas wan pewah tlaachiwah; mostlatipan domingo nochtin yawih miktlan, ompa momachtiah noso motlatzahtziliah, kitlaliah xochitl, kinxotlaltiah veladoras wan kitzitzikuitzah teochiwalatl, mixpowa wan tlakopah.

Ikon kichiwah mikkailwitl nikan Ascuauhtlamanca.





TOTOLIMEH MOMAKILIAH Jorge Luis Hernández

14 02 2011



Sen teotlaktli ompa kalkuitlapan ome tenanmeh yehyetokeh, motlapowihtokeh iwan mokamanalwihtokeh wan sen tlen chaneh isiwaikni okiwalilwih:

–Kualli xikitta, tla keh miak totolimeh tzaktokeh, se tikonkixtis, wan oksemi tikonkalakis, tiksepanos inwan oksekimeh tlen ompa yotzaktoyah, inontin pewah kimakiliah noso kipachiliah, kimiakkawiah wan san nochtin mokuih, anmatti tleka ihkon kimotoktiah.

Okse tenan tlen otetlahpaloto noihki okinankilih:

–Kemah yonikimittak, mochiwah kemin tehwan wan okseki altepetlakah, ihkuak kanah xiyah wan oksemi xiwalmokuapa nikan ximochantlaliki, nochtin pewah san mitzonchichikoittaskeh, pewah tetlatlahtolwiah, inon noihki tekokoh, kemin totolin kikohkowah ikniwan…